Кибер жиноятчилар ҳужум усулларини доимий равишда такомиллаштириб бормоқда. Илгари ransomware асосан маълумотларни шифрлаб, уларни тиклаш эвазига тўлов талаб қилган бўлса, бугунги кунда тобора кўпроқ Double Extortion — икки босқичли товламачилик усули қўлланилмоқда.
Breachsense таҳлилчиларининг маълумотларига кўра, 2026 йил июль ойида Европадаги бир қатор ташкилотлар айнан шундай ҳужумларга учради. Ҳужумчилар аввал махфий маълумотларни ўғирлаб, шундан кейингина тизимларни шифрлаган. Агар компания тўловни рад этса, ўғирланган маълумотларни оммага ошкор қилиш билан таҳдид қилган.
Шу сабабли энди захира нусхаларининг мавжудлиги ҳам тўлиқ ҳимояни кафолатламайди. Компания тизимларни тиклаши мумкин, бироқ мижозлар маълумотлари, тижорат сирлари ёки ички ҳужжатларнинг ошкор бўлиш хавфи ҳужумчилар қўлидаги кучли босим воситаси бўлиб қолади.
☝️ Хавфни қандай камайтириш мумкин?
Маълумотлар узатилишини назорат қилинг.
Корпоратив тармоқдан катта ҳажмдаги маълумотларни ноқонуний чиқаришга уринишларни ўз вақтида аниқлаш ва тўхтатиш учун DLP (Data Loss Prevention) ечимларидан фойдаланинг.
Захира нусхаларини алоҳида муҳитда сақланг.
Баcкуп нусхалари асосий инфратузилмадан ажратилган ва ўзгартириб бўлмайдиган ҳимояланган муҳитда сақланиши керак. Бу ҳатто асосий тизимлар бузилган тақдирда ҳам уларни сақлаб қолишга ёрдам беради.
Корпоратив инфратузилмани сегментатсия қилинг.
Тармоқни сегментларга ажратиш ҳужумнинг бутун инфратузилма бўйлаб тарқалишини чеклайди ва ҳужумчиларнинг муҳим тизимлар орасида эркин ҳаракатланишига йўл қўймайди.
Ходимларнинг киберхабардорлигини оширинг.
Кўплаб ҳужумлар пҳишинг ёки ижтимоий муҳандисликдан бошланади. Мунтазам тренинглар ходимларга бундай таҳдидларни ўз вақтида аниқлаш ва хавфли хатоларнинг олдини олишга ёрдам беради.
Инсидентларга тайёргарликни мунтазам текшириб боринг.
Киберўқув машғулотлари жамоага ҳақиқий ҳужум шароитида ҳаракат қилишни машқ қилиш ва реал инсидент юз берганда жавоб бериш вақтини қисқартириш имконини беради.
Бугунги ransomware ҳужумлари фақат маълумотларни шифрлаш билан чекланмайди — уларнинг асосий мақсади маълумотларни ўғирлаш ва улар орқали босим ўтказишдир. Шу сабабли самарали ҳимоя фақат техник воситаларга эмас, балки тўғри ташкил этилган жараёнлар ва ходимларнинг юқори даражадаги киберхабардорлигига ҳам таянади.